DENDEGO AWACHARUKIA WANAOMTUKANA RAIS SAMIA MITANDAONI

 Na Amini Nyaungo

MKUU wa Mkoa wa Singida, Halima Dendego, amesema kuwa watu wote wanaomtukana Rais Samia mitandaoni wamekula hasara kwani kazi anayoifanya ndiyo inayoongea.

Ameyasema hayo leo tarehe 10.10.2024 katika Tamasha la Wanawake na uchaguzi lililofanyika katima viwanja vya Bombadia mkoa wa Singida

''Wanaosema Samia hajafanya kitu waje Mkoa wa Singida mimi nitatumia muda wangu kuwaonyesha makubwa aliyoyafanya,"Dendego

Aidha amesema kuwa Rais Samia anafanyakazi kwa vitendo pamoja na haki ya hofu ya Mungu na hiyo ndio sababu inayomfanya aendelee kufanya vizuri katika kazi zake.

Kupitia kongamano hilo Dendego amesema kuwa Mkoa wa Singida wapo tayari kuyasema mazuri yote yanayofanywa na Samia kwani anaendelea kutoa fedha nyingi za kuleta maendeleo mkoani hapa.

Wakati huo huo Katibu Tawala Mkoa wa Singida, Dk.Fatuma Mganga, amesema kongamano hili ni kwa ajili ya kuhamasisha wanawake kujitokeza kugombea nafasi mbalimbali za uongozi katika uchaguzi wa serikali za mitaa utakaofanyika Novemba 27, 2024.

Amesema uwakilishi wa wanawake katika nafasi mbalimbali za uongozi katika mkoa ww Singida ni mdogo sana mfano katika vitongoji 2000 vilivyopo mkoani Singida uwakilishi wa wanawake kwenye uongozi ni asilimia 4 tu.

Dk.Mganga amesema katika vijiji 441 vilivyopo Mkoa wa Singida ni wanawake watano tu ndo walipata nafasi ya uongozi kuwa wenyeviti wa vijiji ambao ni sawa na asilimia moja tu wakati katika kata 136 ni kata nne tu ndo waliokwenda kuchukua kata.

"Katika Manispaa ya Singida kuna mitaa 53 lakini wanawake waliodhubutu kuchukua fomu na kushinda ni watatu tu wakati katika nafasi ya ujumbe  kati ya nafasi 11,000 za wajumbe wa serikali za mitaa wanawake 3,125 ndo wajumbe wa serikali za mitaa," alisema.

Mwisho