MWENGE WA UHURU KUMULIKA MIRADI 47 SINGIDA -DENDEGO

 

Na Amini Nyaungo 

Mwenge wa Uhuru kwa mkoa wa Singida mwaka 2024 utapitia miradi 47 ya maendeleo yenye thamani ya shilingi bilioni 100.121  ambapo utakimbizwa katika wilaya tano za mkoani hapa pamoja na Halmashauri zote 7 utapokelewa July 5,2024 na  utakabidhiwa July 12 kwa mkoa wa Manyara.

Hayo ameyasema leo Mkuu wa Mkoa wa Singida MH. Halima Dendego alipokuwa anaongea na Waandishi wa Habari Ofisini kwake juu ya mapokezi ya Mwenge wa Uhuru ambapo utapokelewa shule ya Msingi Chikuyu katika kijiji cha Kikuyu kilichopo Wilaya ya Manyoni saa kumi na mbili asubuhi akitanabaisha kuwa maandalizi yamekamilika na kuwaomba wananchi kujitokeza kuupokea Mwenge wa Uhuru.

"Maandalizi ya mapokezi ya Mwenge wa Uhuru mkoani Singida yamekamilika,niwaombe wananchi wajitokeze kwa wingi kuupokea," Dendego 

Mwenge utakimbizwa wilaya zote 5 halmashauri 7 utakabidhiwa Mkoa wa Manyara 12 July 2024 wakati huo kwa Mkoa wa Singida utakimbizwa umbali wa kilomita 800.75.

Kauli mbiu ya Mwenge wa Uhuru mwaka huu ni  "Kutanza Mazingira na kushiriki uchaguzi wa serikali za mitaa na  maendeleo endelevu ya taifa".

" Niwaombe Wanasingida tushirikiane kwa pamoja kuona mbio hizi za aina yake na umuhimu wake," Dendego.

Aidha Halima Dendego amesema ya kuwa miradi hiyo itagharimu kiasi cha bilioni 100.121 huku wananchi wa Singida wametoa mchango milioni 287.442 Halmashauri Milioni 677.837 Serikali kuu Bilioni 30.582 Wahisani bilioni 68.259.

Wananchi wa Singida wamejitokeza kuchangia milioni 313 kwa ajili ya shughuli za mwenge wa uhuru katika vifaa na maandalizi kwa ujumla ya Mwenge huo.

Mheshimiwa Halima Dendego ameishukuru serikali kupitia Rais Samia Suluhu Hassan katika kuboresha Shughuli mbalimbali za maendeleo, huku akimsifu kwa kutumia vyema Diplomasia kupelekea wawekezaji na wahisani kujitokeza na kuwekeza nchini Tanzania.

Aidha katika kutunza mazingira amesema kuwa Singida ina kila sababu ya kuweka mazingira safi na salama katika mipango yao wanaendelea kupanda miti na mwaka huu wamepanda miti milioni 9.75 pia wameweka mikakati ya kuitambua miti ya asili. 

Kwa kutambua umuhimu wa vyanzo vya maji Mwenge wa Uhuru utapita katika vyanzo mbalimbali vya maji mkoani Singida .

"Sisi tunashiriki kutunza mazingira kama ilivyo sehemu nyingine za dunia, tunaendelea kuhamasisha watu kutumia nishati safi ya kupikia, kauli mbiu yetu Singida ya Kijani ndio dira yetu,"Dendego

Aidha katika hali ya usalama amewahakikishia wananchi kuwa watakuwa na tahadhari huku akiwashauri wazazi kuwa makini na watoto kwani ulinzi wa awali unaanzia kwao ila wao kama serikali wataimarisha ulinzi.

Mwisho